Rundt klokka 14:00 på torsdag byrja lukta av popkorn og arme riddere å spre seg i leiren, det var klart for marknadsdag. Mange av gruppene hadde lagt mykje arbeid ned i aktiviteten sin og kreativiteten var stor. Nede ved sjøen kunne ein oppleve mellom anna hesteveddeløp hjå 1. Fjøsanger, 4. Bergen sin frisørsalong, krabbeløp hjå Bua, bowling med Bergen M/S og sette seg ned på kafé hjå Rosendal. Den nyoppretta valutaen "Hundrings" fekk bein å gå på. Marknadskreftene var så harde at ut over dagen måtte nokre speidarar ty til tigging på grunn av kjøpepresset. I tillegg til speidarane var det óg ein del foreldre og vener som tok turen for å oppleve marknad på ekte speidarvis. 100-Lappen snakka med ei jente som etter denne dagen gledde seg til å byrja i speidaren neste år. Så om marknadskreftene kanskje var litt harde, hadde i alle fall reklamekreftene ein positiv effekt.